ഉത്തരങ്ങൾ

ഉത്തരങ്ങൾ എല്ലാം പഠിച്ചു
ചോദ്യക്കടലാസിലെ
ഏതു ചോദ്യത്തിനും ഇനി രക്ഷയില്ല

ഒന്നാം ക്ലാസ്സിലെയും
പത്താം ക്ലാസ്സിലെയും
പി എസ് സി യുടെയും
ചോദ്യങ്ങൾ ഇനി പരാജയപ്പെടും
ട്യൂഷനും ക്ലാസ്സും കട്ട് ചെയ്യാതെ
പഠിക്കാനുള്ളതെല്ലാം പഠിച്ചു
റാങ്കും മെഡലും കിട്ടി
നിങ്ങൾ ചോദ്യങ്ങൾ ചോദിക്കൂ
ഉത്തരം പറയാം
അതെ ചോദ്യങ്ങൾ നിങ്ങൾ ചോദിക്കണം
സില്ലബസ്സിനകത്ത് നിന്ന് മാത്രം
ആപ്പിൾ വീണാലും തേങ്ങ വീണാലും
പൂവു വീണാലും
പുതിയ ചോദ്യങ്ങൾ ചോദിക്കാൻ പറയരുതേ
കാരണം ചോദ്യങ്ങൾ ചോദിക്കുന്നവർ
ക്ലാസിനു പുറത്ത് പോകുമെന്നതുകൊണ്ട്
ഉത്തരങ്ങളേ പഠിച്ചിട്ടുള്ളൂ
അതു കൊണ്ട് ന്യൂട്ടനും കുമാരനാശാനും
പറഞ്ഞ ഉത്തരങ്ങൾ വീണ്ടും പറയാം
ഉത്തരങ്ങൾ !
ഉത്തരങ്ങൾ സർട്ടഫിക്കറ്റ് തരുന്നു
ഉത്തരങ്ങൾ ജോലി തരുന്നു
ഉത്തരങ്ങൾ പണം തരുന്നു
പുതിയ ചോദ്യങ്ങൾ ആരെങ്കിലും ചോദിച്ച്
ഉത്തരങ്ങൾ ഉണ്ടാക്കട്ടെ
ആ ഉത്തരങ്ങൾ പഠിച്ച്
ഉത്തരങ്ങളെഴുതാം
ഉത്തരങ്ങൾ മാത്രം
വിദ്യാഭ്യാസം ജയിക്കട്ടെ !