താവളം

.......................................................................................
വിമാനമേ നിന്റെ താവളം വന്നപ്പോൾ തകർന്നത്
എന്റെ സന്തോഷത്തിന്റെ താവളം മാത്രമല്ല;
നാട്ടുനെൽ വിത്തുകളുടെ താവളം
കാക്കപ്പൂ വിന്റെയും നിലം പരണ്ട യുടെയും താവളം

വെയിലാറിയാൽ പറന്നിറങ്ങുന്ന
തത്തയുടെയും പ്രാവിന്റെയും താവളം
നീർക്കോലിയുടെയും    നീർക്കാക്കയുടെയും  താവളം
പച്ചക്കടലിന്റെയും സ്വർണ്ണക്കടലിന്റെയും താവളം

മഴത്തുള്ളികളുടെയും മഞ്ഞിന്റെയും താവളം
വരമ്പിന്റെയും വരാലിന്റെയും താവളം
ഞാട്ടിപ്പാട്ടിന്റെയും ഞാറിന്റെയും താവളം
ഞാഞ്ഞൂലിന്റെയും പുൽച്ചാടിയുടെയും താവളം
........................
തകർച്ചയുടെ കണക്കു പുസ്തകം എഴുതി
തീർന്നാലും ബാക്കിയാവുന്നു വിമാനമേ
നിന്റെ താവളത്തിന് കിടക്കാൻ
കുഴിച്ചുമൂടിയ താവളങ്ങളുടെ വേദന ! 
............................................................................................