നീലപ്പുള്ളികൾ

വയലിലേക്കിറങ്ങണം
വരമ്പിലൊക്കെയും
കോട വന്നു നില്ക്കുന്നു
കുളിരെന്നെ പിടിച്ചു വെക്കുന്നു
കാക്കപ്പൂവു കാത്തു നിൽക്കുന്നു

ഉടുക്കുവാനൊരു
പൂവുടുപ്പുതായെന്നോതി
വെളുക്കും മുമ്പെന്നെ
പറമ്പിലേക്കോടിച്ച്
പൂത്തറയതാ
മുറ്റത്തുടുക്കാതെ നിൽക്കുന്നു

പാടത്ത് കിളികൾക്കൊപ്പം
വെളുപ്പു പറന്നിറങ്ങുന്നു ;
പച്ചപ്പുല്ലിൽ വീണ താരകങ്ങളവ
കൊത്തിത്തിന്നുന്നു

കാക്കപ്പൂവെനിക്കൊരുപാടു
നീലപ്പുള്ളികൾ തന്നു
ഇനിയും പല പല നിറങ്ങൾ
പലപൂക്കളോടു വാങ്ങണം

തൊടിയിലും പറമ്പിലും
ഒരു ശലഭമായലയണം
പൂത്തറയ്ക്കൊരോണക്കോടി
നെയ്തു കൊടുക്കണം !