തടവറ

നിലവിളികൾപോലുമനാഥമാകുന്ന
തടവറ നിർമ്മിക്കുവാനീ വഴിവന്ന
ഭീകരജീവിയാണു യുദ്ധം

വേദനകൾ കൊണ്ടുള്ള  
അദൃശ്യമായ ചുമരുകളിൽ
അത് മരിച്ചവരുടെ ചിത്രങ്ങൾ
കാരുണ്യമില്ലാതെ  തൂക്കിയിടും

പുറത്തലയുമ്പോൾ
കത്തിപ്പോയ കൊടികളിൽ
തൊട്ടുനോക്കുവാൻ വന്ന  കാറ്റിനുപോലും
കൊടിയേന്തിയവന്റെ
രാജ്യത്തെ കുറിച്ച് ഒരു വിവരവും ലഭിക്കാത്ത
ഒരിടത്തല്ലാതെ അത് തടവറ പണിയില്ല

ഒരു രാജ്യത്തിന്റെ വിസ്തൃതിയിൽ നിന്നും
അതിരു പൊളിച്ച് അത് വളരുന്നു

ഒരിക്കൽ തടവറയിലായാൽ
നഷ്ടപ്പെട്ട കുഞ്ഞുങ്ങളുടെ
പ്രകാശത്തിൽ നടന്ന ഒരു കാലം മാത്രം
സന്തോഷതാരകമായി വിദൂരതയിൽ ഉദിക്കും

അതിലേക്കു പറന്നു പോകുന്നത്
സ്വപ്നം കണ്ട് അവശേഷിക്കുന്ന
പച്ചപ്പ് മെല്ലെ തലനീട്ടും

തടവറ പൊളിക്കുവാൻ
ഒരു വേരെങ്കിലും
മുതിരുമെന്നൊരുൾവിളിയാൽ !