മഴ വരയ്ക്കുന്നു

വരച്ച ചിത്രങ്ങളിൽ
മതിവരാതെ
വീണ്ടും വീണ്ടും മഴ
ബ്രഷ് ചലിപ്പിക്കുന്നു

മണ്ണിൽ ചായങ്ങൾ ഇളക്കിയെടുത്ത്
പിക്കാസോയും ദാലിയും
വാൻഗോഗും രവിവർമ്മയും
വരയ്ക്കാൻ ശ്രമിച്ച്
പരാജയപ്പെട്ട വേദനകൾ
മഴ വരയ്ക്കുന്നു

ഞാനും നീയും
മുരിങ്ങ മരവും
മാവിൻ തൈകളും
വീണ്ടും വീണ്ടും തെളിയുന്നു

രാവും പകലുമതു നോക്കി നിൽക്കുമ്പോൾ
തളിരിലകളും മിന്നാമിനുങ്ങും
വരാൽ കുഞ്ഞുങ്ങളും
അതു കാണാൻ വരും

അന്നേരം കുടചൂടി പ്പോകുന്ന
അരസികനായ ഒരാൾ
വീശുന്ന വലയിൽ
കുടുങ്ങി ചിത്രം കീറും

എന്നാലും മഴ വീണ്ടും വീണ്ടും വരയ്ക്കും