അവൾ ...................................

കിനാവിന്റെ ഒരു മുടിയിഴ
അവളുടെ പുസ്തകത്തിലുണ്ട്
എത്ര ഗാഢമായാരവളെ
ഉറക്കിയാലും
അവളതെടുത്തു നോക്കും.

വിവാഹ നിശ്ചയത്തിന്റെ
അന്നാണ് അവൾ
സ്വപ്നത്തിന്റെ വീട്ടിൽ പോയത്
വിവാഹം വരെ അവളവിടെ
ഇളംകാറ്റായിരുന്നു

ഏതോ ഒരു കിനാവ്
ആരുമറിയാതെ
അവൾക്കു കൊടുത്ത ആ മുടിയിഴ
ആരുമറിയാതെ അവളിന്നും
എടുത്തു നോക്കും
ചിരിക്കും ചിന്തിക്കും.

എന്നിട്ട്
അദ്ദേഹത്തിന്റെ നെഞ്ചിൽ നിന്നും
തനിക്കുമാത്രമുള്ള ഒരു കിനാവ്
ഒരുമുടിയിഴ പോലും തന്നില്ലല്ലോ എന്ന് വെറുതെ
വെറും വെറുതെ വിചാരിക്കും